14-nji martda Dubaýda (BAE) Türkmenistanyň milli ýygyndysy Gazagystanyň toparyna garşy geçirilen ýoldaşlyk oýnunda utuldy. Oýun 2:0 hasabynda tamamlandy. Oýun taraplaryň özara ylalaşygy netijesinde ýapyk görnüşde geçirildi. Toparlar resmi oýunlardan öň “öz güýçli we gowşak taraplaryny” kesgitlemek islediler diýlip, Türkmenistanyň milli ýygyndysynyň metbugat relizinde bellenildi. “Netije çykarýarys we işlemegi dowam edýäris” diýlip, ýurduň milli ýygyndysynyň teswirinde aýdylýar. Ýatlap geçsek, Türkmenistanyň milli ýygyndysy 2026-njy ýylyň dünýä çempionatynyň saýlama ýaryşynyň Eýrana garşy oýunlaryndan öň türgenleşik geçmek üçin BAE-e geldi. Uly çempionatlaryň final tapgyrlaryna yzygiderli gatnaşýan we Ýewropanyň öňdebaryjy ligalarynda çykyş edýän Eýranyň futbolçylary hem gapma-garşylyga faworit hökmünde taýýarlanýan bolsa gerek. Şonuň üçin Gazagystanyň topary bilen geçirilen oýun Mergen Orazowyň topary üçin has çynlakaý synagdan öň gymmatly güýç synagyna öwrüldi.