“Sportico” neşiri taryhda iň köp girdeji gazanan türgenleriň täzelenen reýtingini hödürledi. Sanaw neşiriň saýtynda berilýär. Hasaplamada, inflýasiýa göz öňünde tutulyp, türgeniň karýerasynyň dowamyndaky we ony tamamlandan soňky zähmet haklary, bonuslary, baýrak haklary, sport bilen baglanyşykly işlerden gazanan girdejileri göz öňünde tutuldy. Reýtingde birinji orny Milli basketbol assosiasiýasynyň (MBA) alty gezek çempiony Maýkl Jordan eýeledi. Ol 3,75 mlrd dollar gazandy. Ikinji orunda 2,66 mlrd dollar bilen golfçy Taýger Wuds ýerleşdi. Üçlügi 1,92 mlrd dollar bilen Kriştianu Ronaldu jemledi. Sanawyň yzyny şular dowam etdirýär: dördünji – golfçy Arnold Palmer (1,76 mlrd dollar), bäşinji – basketbolçy Lebron Jeýms (1,7 mlrd dollar), altynjy – golfçy Jek Niklaus (1,67 mlrd dollar), ýedinji – futbolçy Lionel Messi (1,67 mlrd dollar), sekizinji – futbolçy Dewid Bekhem (1,5 mlrd dollar), dokuzynjy – tennisçi Rojer Federer (1,49 mlrd dollar), onunjy – boksçy Floýd Meýwezer (1,48 mlrd dollar). Iň köp girdeji gazanan 50 türgeniň arasynda dünýäniň öňki birinji raketkasy Serena Wilýams ýeke-täk zenan türgendir. Ol 630 mln dollar bilen 40-njy orny eýeleýär.