6-njy martda Türkmenistanyň Daşary işler ministrliginiň Halkara gatnaşyklary institutynda «Parahatçylygyň ýaş çaparlary» atly akyl-paýhas bäsleşiginiň III möwsüminiň VII saýlama oýny geçirildi. «Beýik Magtymguly Pyragynyň taglymaty — umumadamzat gymmatlyklarynyň milli şamçyragy» atly umumy şygar astynda geçirilýän III möwsümiň VII saýlama oýnunyň temasy «XVIII asyrda – XIX asyryň I çärýeginde Hywa hanlygynyň we Buhara emirliginiň halkara gatnaşyklary we diplomatiýasy» diýlip atlandyryldy. «Parahatçylygyň ýaş çaparlary» atly akyl-paýhas bäsleşiginiň III möwsüminiň VII saýlama oýnuna Aşgabat şäherinden 2 sany, Ahal welaýatyndan 1 sany, Daşoguz welaýatyndan 1 sany, Lebap welaýatyndan 1 sany we Mary welaýatyndan 3 sany mekdep okwuçysy gatnaşdy. Çekeleşikli ýagdaýda geçen «Parahatçylygyň ýaş çaparlary» atly akyl-paýhas bäsleşiginiň III möwsüminiň VII saýlama oýnunda Aşgabat şäherindäki Saparmyrat Türkmenbaşy adyndaky ýöriteleşdirilen umumy bilim berýän mekdep internatynyň 10-njy synp okuwçysy Nurgözel Gutlyýewa hem-de Aşgabat şäheriniň ýöriteleşdirilen 52-nji orta mekdebiniň 11-nji synp okuwçysy Resul Baýmyradow dagy ýeňiji boldular. Ýeňijilere we bäsleşige gatnaşyjylara institutyň adyndan Hormat hatlary, Magtymgulynyň 300 ýyllygyna bagyşlanyp TDIM-iň Halkara gatnaşyklary instituty tarapyndan taýýarlanylan «Magtymguly Pyragynyň umumy adamzat ähmiýetli parahatçylyk taglymaty we häzirki zamanyň möhüm meseleleri» atly ylmy makalalar ýygyndysy, şeýle-de hemaýatkärler tarapyndan gymmat bahaly ýadygärlik sowgatlary gowşuryldy. Ýeri gelende bellesek, bäsleşigiň III möwsüminiň VII saýlama oýnuna Türkmenistanyň Ylymlar akademiýasynyň Magtymguly adyndaky Dil, edebiýat we milli golýazmalar instituty, Türkmenistanyň Magtymguly adyndaky Ýaşlar guramasynyň Merkezi Geňeşi, Türkmenistanyň Milli ýaý atyjylyk federasiýasy, Türkmenistanyň Senagatçylar we telekeçiler birleşmesi, «Abadan haly» açyk görnüşli paýdarlar jemgyýeti, «Aýdyň gijeler» hojalyk jemgyýeti, «Ýedi dogan» hususy kärhanasy, «Muhammet Balkan» hojalyk jemgyýeti, «Düwmejik» hususy kärhanasy, «Ak menzil» hususy kärhanasy hemaýatkärlik etdiler. «Paahatçylygyň ýaş çaparlary» atly akyl-paýhas bäsleşiginiň III möwsüminiň VII saýlama oýny ýakyn günlerde «Miras» teleýaýlymynda tomaşaçylara ýetiriler.