Kan film festiwalynyň iki “Altyn palma şahasynyň” ýeňijisi, meşhur serbiýaly kinorežissýory Emir Kusturisa Fýodor Dostoýewskiniň “Tentek” hem-de “Jenaýat we jeza” romanlarynyň sýužetlerini birleşdirjek täze “Jeza berilmesiz jenaýat” filmini yglan etdi. Şol bir wagtyň özünde filmdäki wakalar häzirki döwre geçiriler diýip, TASS habar berýär. Film Sankt-Peterburgda we Sibirde surata düşüriler. Ondan öň Kusturisa “Jenaýat we jeza” filmini rus dilinde surata düşürmegi meýilleşdirýändigini yglan edipdi. Onuň sözlerine görä, bu onuň rus dilindäki ilkinji filmi bolar. Şondan soň režissýor Ýewgeniý Wodolazkiniň “Lawr” romanyny surata düşürmegi meýilleşdirýär. Onuň rus dilindäki üçünji filmi Nikolaý Gogolyň eserleriniň ekranlaşdyrmagy bolar. Kusturisa bu “Öli janlar” bolarmy ýa-da “Iwan Iwanowiçiň Iwan Nikiforowiç bilen dawalaşyşy barada powest” - entek belli karara gelmedi. Kusturisa Mihail Bulgakowyň ýaňy-ýakynda ekranlaşdyrylan “Ussat we Margarita” filminiň şowly bolandygyny aýtmak bilen, romany dünýäniň iň gowy eserleriniň biri diýip atlandyrdy. Şol bir wagtyň özünde, filmi ekranlaşdyranda Pontiý Pilatyň wakasyna ünsi jemlejekdigini aýtdy.