Aziýanyň Kubogynyň Iordaniýanyň we Kataryň milli ýygyndylarynyň arasyndaky final oýny tamamlandy. Toparlar Kataryň Lusail şäherindäki “Lusail Aýkonik” stadionynda duşuşdylar. Oýun Aşgabat wagty bilen 20:00-da başlandy. Ýaryşyň eýeleri 3:1 hasabynda ýeňiş gazandylar. 22-nji minutda Kataryň milli ýygyndysynyň hüjümçisi Akram Afif penaltiden gol girizip, toparyny öňe çykardy. Iordaniýa 67-nji minutda hüjümçi Ýazan Al-Naýmatyň gol geçirmegi netijesinde hasaby deňledi. Ýöne bäş minutdan soň katarlylar ýene-de 11 metrlik urgyny ýerine ýetirmäge hukuk gazandylar we netijede Afif gol girizdi. 90+4-nji minutda Akram ýene penaltiden gol geçirip, het-trik etdi. Ýatlap geçsek, Kataryň milli ýygyndysy bu kuboga Birleşen Arap Emirliklerinde geçirilen 2019-njy ýylyň ýaryşynda eýe boldy. Aziýanyň Kubogynda iň köp ýeňiş Ýaponiýanyň milli ýygyndysynyň hasabyndadyr. Bu ýurduň futbolçylary dört gezek kubogyň eýesi boldular.