Türkmenistanyň topary Daşkentde badalga alan agyr atletika boýunça Aziýa çempionatyna gatnaşýar. Aziýa çempionatynda Türkmenistanyň milli ýygyndysyna 12 türgen wekilçilik edýär diýip, "Türkmenistan: Altyn asyr" elektron neşiri habar berýär. 2024-nji ýylda Parižde geçiriljek Olimpiýa oýunlaryna gatnaşmaga ýardam edýän utuklar ugrunda geçirilýän bu ýaryşa 34 ýurtdan 239 türgen ýygnandy. Çempionat erkekleriň we zenanlaryň arasynda on agram derejesinde geçiriler. Hytaýly agyr atletikaçylar ýaryşa gatnaşmaýarlar, çünki olar mart-aprel aýlarynda geçiriljek Dünýä kubogy ugrundaky ýaryşa taýýarlanýarlar. Zenanlar toparynyň hatarynda: Durresde (Albaniýa) ýaşy 17-ä çenli gyzlaryň arasynda 2023-nji ýylda dünýäniň çempiony Ogulşat Amanowa (agramy 49 kg çenli), 45 kilograma çenli agramda 2018-nji ýylda dünýä çempiony Ýulduz Jumabaýewa we Kristina Şermetowa (ikisi-de ýokary 55 kilograma çenli), 59 kilograma çenli agramda Tokioda geçirilen Olimpiýa oýunlarynyň kümüş medalynyň eýesi Polina Gurýewa (76 kg çenli), 2023-nji ýylda ýaşy 17-ä çenli gyzlaryň arasynda hem-de 20 ýaşa çenli ýetginjekleriň arasynda Aziýanyň çempiony, 2023-nji ýylda ýetginjekler dünýä çempionatynyň wise-çempiony Enemjan Rustamowa (81 kg çenli) bar. Erkekler toparynda: Seýitjan Mirzaýew (61 kg çenli), Bunýad Raşidow we Bektimur Reýimow (ikisi hem 73 kg çenli), Maksat Meredow (81 kg çenli), 2023-nji ýylda Gwadalaharada (Meksika) geçirilen ýetginjekler dünýä çempionatynyň we 2023-nji ýylda geçirilen Delide (Hindistan) Aziýa çempionatynyň kümüş medalynyň eýesi Gaýgysyz Töräýew (89 kg çenli), dekabr aýynda Dohada (Katar) geçirilen II Gran Pri halkara ýaryşynyň ýeňijisi Şahzadbek Matýakubow (96 kg çenli) we Hojamuhammet Toýçyýew (109 kg-dan gowrak) çykyş ederler. Agyr atletika boýunça Aziýanyň çempionaty 10-njy fewralda tamamlanar.