Mersedes-Benz Emiratyň Binghatti jaý gurluşyk şereketi bilen bilelikde Dubaýda başy gökdirän Mercedes-Benz Places ýaşaýyş jaýyny gurar, ondaky öýleriň hersiniň bahasy 10 million dollar bolar diýip, Inc. habar berýär. Kaşaň diňiň gurluşygyna 1 milliard dollar sarp ediler. 65 gatly bina Dubaýyň gyzgalaňly şäher merkezinden, takmynan, 341 metr belentlige galar. Gurluşyk işleri 2026-njy ýylyň dördünji çärýeginde tamamlanar. Awtoulag öndürijisiniň web sahypasynda aýdylyşyna görä, binada dünýäniň iň beýik minarasy - 828 metr beýiklikdäki Burj-Halifany synlap boljak 150 öý bolar. Golaýda Binghattiniň kaşaň awtoulag öndürijisi Bugatti bilen ýaşaýyş jaý taslamasyny durmuşa geçirýändigini habar beripdik. Bu kompaniýa üçin binada awtoulaglary penthouslara daşamak üçin liftler bolar.