Intel, Samsung Electronics-den öňe geçip, iki ýyllyk arakesmeden soň, ýarymgeçirijileriň bazarynda öňdebaryjy boldy we NVIDIA ilkinji gezek, emeli aň ulgamlaryna bar bolan ýokary islegiň hasabyna ilkinji bäşligiň hataryna girmegi başardy. Gartner gözleg we maslahat beriş kompaniýasynyň deslapky maglumatlary muňa şaýatlyk edýär diýip, 3DNews habarlar gullugy habar berýär. Umuman alanyňda, seljerijileriň belleýşi ýaly, 2023-nji ýylyň ahyrynda ýarymgeçiriji komponentleriň bazarynyň göwrümi pul hasabynda 11,1% , ýagny 533 milliard dollara çenli azaldy, sebäbi bu döwürde gözegçilikleriň tutuş taryhynda ýat segmentinde iň kyn ýagdaý emele geldi. Ýarymgeçiriji önümleri bilen üpjün edýän 25 sany iri üpjün edijiniň diňe 9-sy 2023-nji ýylyň ahyrynda girdejiniň ösüşini hasaba alyp bildi, beýleki 10-sy bolsa göterim hasabynda iki belgi peselendigini görkezdi. Şol bir wagtyň özünde, iň uly 25 sany çip üpjün edijiniň girdejisi bazara gatnaşyjylaryň umumy girdejisiniň 74,4% -ini emele getirdi we ol geçen ýylyň netijelerine görä 14,1% azaldy. Samsung Electronics iň iri ýat öndürijisi bolmagynda galýar, şonuň üçin 2023-nji ýylda önümleriniň bahasynyň arzanlamagy sebäpli ep-esli zyýan çekdi. Günorta Koreýa kompaniýasynyň girdejisi 37,5% azaldy we 39,9 milliard dollar boldy. Netijede, Samsung iki ýyllyk öňdebaryjylykdan soň, Intel korporasiýasyna birinji ornuny berip, özi ikinji ýeri eýeledi. Şol bir wagtyň özünde, Intel geçen ýylyň ahyrynda girdejisini 16,7% azaltdy, ýöne onuň 48,7 milliard dollarlyk absolýut gymmaty Samsung-dan öňe geçmäge we iň iri çip üpjün edijileriniň sanawynda öňdeligi eýelemäge mümkinçilik berdi. Qualcomm 29 mlrd dollar girdeji bilen üçünji orunda galdy, ýogsam 2022-nji ýyl bilen deňeşdirilende, 16,6% peselipdi. Broadcom-yň girdejisi 7,2 %, ýagny 25,6 milliard dollara çenli ýokarlanyp, dördünji orunda durýar. NVIDIA ilkinji gezek ilkinji bäşligiň hataryna girip, on ikinji orundan bäşinji orna çykmagy başardy. Gartner-iň maglumatlaryna görä, geçen ýyl onuň girdejisi 56,4% ýokarlap, 24 milliard dollara ýetipdi.