Amerikaly matematikler halkara matematika olimpiadalaryna gatnaşyjylaryň başarnyklaryna baha bermek üçin ulanylýan iň çylşyrymly geometrik meseleleri çözmäge ukyply emeli aň ulgamyny döretdiler diýip, TASS Nature žurnalynyň makalasyna salgylanyp habar berýär. "Ewklid geometriýasyndaky teoremalary, gapdaldan adam kömegi bolmazdan, subut edip bilýän AlphaGeometry ulgamyny döretdik. Ol ýakynda halkara matematika olimpiadalarynda ulanylan 30 meseläniň 25-sini çözmegi başardy, bu beýleki AI ulgamlarynyňkydan ep-esli köpdür we bu ýaryşlarda altyn medal gazananlaryň üstünlikleri bilen deňeşdirerliklidir"diýip, gözlegçiler ýazýarlar. AlphaGeometry Deepmind-iň uly alymy Min-Thang Luongyň ýolbaşçylygyndaky matematikler topary tarapyndan döredildi. Ulgam AI üçin iň amatsyz matematiki meseleleri çözmäge - ýewklid geometriýasy bilen baglanyşykly teoremalaryň subutnamalaryny gözlemäge ukyplydyr. Olary çözmegiň çylşyrymlylygy algoritm üçin düşnükli dile terjime etmegiň, şeýle hem öwretmek üçin ýeterlik mukdarda mysal ýygnamagyň kynlygy bilen baglydyr. DeepMind-yň hünärmenleri döreden AlphaGeometry dil neýro ulgamyny, şeýle hem eýýäm belli matematiki kanunlary ulanyp, köp sanly sintetiki teoremany we subutnamany ösdürmäge mümkinçilik berýän ýörite algoritm ulanyp, bu meseläni çözmegi başardylar. Netijede, alymlar neýro ulgam üçin özboluşly “geometriýa okuw kitaby” aldylar - AI ulgamyna düşnükli dilde ýazylan 100 million geometrik teoremanyň göçürmesini aldylar.