Hindistanyň Güni öwrenmek üçin niýetlenen kosmos obserwatoriýasy «Aditya-L1» şenbe güni Ýerden 1,5 million km uzaklykda ýerleşýän Lagranž L1 nokadynyň çäklerindäki galo-orbitasyna üstünlikli bardy diýip, interfax.ru Hindistanyň kosmos gözleg guramasyna (ISRO) salgylanyp habar berdi. «Güni öwrenmek üçin uçurylan «Aditya-L1» obserwatoriýasy 2024-nji ýylyň 6-njy ýanwarynda Hindistanyň wagty bilen sagat 16:00-da galo-orbitasyna bardy» diýlip, guramanyň beýanatynda aýdylýar. Berilýän maglumatlara görä, bu galo-orbita enjamy dolandyrmak üçin edilýän hereketleriň sanyny iň pes derejä getirmek we şeýlelik bilen, obserwatoriýanyň 5 ýyl işlemegini üpjün etmek üçin ýangyç sarp edilişini azaltmak maksady bilen saýlandy. «Aditya-L1» obserwatoriýasy ylmy barlaglary geçirmek üçin dürli enjamlar bilen enjamlaşdyrylandyr. Ol Günüň fotosferasyny we hromosferasyny, şeýle hem magnit meýdanlaryny we elektromagnit bölejikleri, spektrometrleri hem-de koronagraflary kesgitlemek üçin niýetlenen gurallar arkaly onuň ýokarky gatlagyny – Günüň täjini öwrener. Alymlar Günüň täjindäki iri partlamalaryň we Gün uçgunlarynyň sebäplerine düşünmäge kömek etjek täze maglumatlary almagy, şeýle hem kosmos howasyny we L1 nokadyndaky magnit meýdanyny öwrenmegi maksat edinýärler.