Business Insider-iň habaryna görä, geçen hepde Threads sosial ulgamy ABŞ-da Apple AppStore dükanynda iň meşhur programma boldy we bäsdeşi Ilon Maskyň X-sinden öňe geçdi. Häzirki wagtda Instagram ilkinji onluga girýär we Meta-nyň iň irki platformasy Facebook bilen bilelikde TikTok-dan has çalt ösýär. Meta-nyň X-a meňzeş işleýän Threads programmasy alty aý mundan öň işe girizilipdi. Meşhurlygy çalt artyp, 150 million gezek ýüklenip alnan Threads rekord goýdy, ýöne programmanyň aýratynlyklarynyň ýeterlik däldigi we birneme ýönekeý bolany üçin, ulanylyşy gysga wagtda pese gaçdy. Soňky hepdeleriň dowamynda Instagram tehnologiýasy esasynda programmany döreden 15 inženerden ybarat topar platforma üýtgetmeler we goşmaçalar girizdi, ulanyjylar bolsa gaýdyp geldiler we şol ýerde galdylar. Soňra Threads web wersiýasyny açdy we ony 14-nji dekabrda Ýewropa Bileleşigi üçin açdy. Görnüşine görä, hut şu ädim platformany Apple AppStore dükanynda birinji orna çykardy. Ýöne soňky hepdelerde Threads ilkinji bäşlige giren hem bolsa, ÝB üçin açylandan soň arzanladylan harytlar bazary bolan Temudan soň ikinji ýeri eýeledi. Ýöne eýýäm çarşenbe güni birinji ýere çykdy we şondan bäri şol ýerde galdy. Threads Google Play Store-da iň meşhur mugt programma hökmünde bäşinji ýerde durýar. Threads-iň ulanyjylarynyň sany soňky üç aýyň dowamynda yzygiderli artýar. Apptopia-nyň maglumatlaryna görä, gündelik işjeň ulanyjylaryň sany 17% artyp, takmynan, 35 million adama, aýlyk işjeň ulanyjylaryň sany 27% artyp, 140 million adama ýetdi. Apptopia-nyň habaryna görä, işe girizilenden bäri ol jemi 445 million gezek ýüklenip alyndy.