Halkara futbol federasiýasy (FIFA) ýylyň iň owadan goly üçin gowşurylýan Ferens Puşkaş adyndaky baýraga dalaşgär üç oýunçynyň adyny yglan etdi. Bu barada guramanyň resmi web sahypasynda habar berilýär. 2023-nji ýylyň jemleri boýunça bu baýraga «Braýtonda» çykyş edýän paragwaýly Hulio Ensiso we onuň 24-nji maýda Angliýanyň çempionatynda «Mançester Sitiniň» derwezesine geçiren pökgüsi, Braziliýanyň «Seriýa B» çempionatynda 27-nji iýunda «Noworizontino» bilen geçirilen oýunda tapawutlanan braziliýaly futbolçy Gilýerme Madruga («Botafogo Ribeýran-Pretu») hem-de Portugaliýanyň çempionatynda 12-nji martda «Boawista» bilen oýunda pökgini derwezä girizmegi başaran «Sporting» toparynyň portugaliýaly oýunçysy Nunu Santuş dalaşgärlik edýärler. Ýeňijiniň ady 2024-nji ýylyň 15-nji ýanwarynda Londonda geçiriljek dabarada yglan ediler. Bu baýragyň häzirki eýesi amputasiýaly türgenleriň milli çempionatyndaky oýunda üstaşyr urgy bilen pökgini derwezä salmagy başaran polşaly amputant futbolçy Marsin Oleksiýdir.