Şu gün Ankaranyň “Konk Halı Saha” sport toplumynda, Türkmenistanyň Türkiýe Respublikasyndaky Ilçihanasy tarapyndan Halkara Bitaraplyk güni mynasybetli sportuň kiçi futbol görnüşi boýunça bäsleşik geçirildi. Bu barada Türkmenistanyň DIM-niň metbugat gullugy habar berýär. Bäsleşige Türkiýäniň ýokary okuw jaýlarynda okaýan türkmen we daşary ýurtly talyplar, türkmen diasporasynyň wekilleri, şeýle hem Ankarada akkreditlenen Azerbaýjanyň, Gazagystanyň, Gyrgyzystanyň, Täjigistanyň we Özbegistanyň Ilçihanalarynyň wekilleri gatnaşdylar. Dostlukly ýagdaýda geçirilen bu bäsleşik diňe bir sport çäresi bolman, eýsem döwletara parahatçylygyň we hoşniýetliligiň nyşanyna öwrüldi. Ýaryşyň netijeleri boýunça ýeňijilere Ilçihana tarapynda degişli sowgatlar we şahadatnamalar gowşuryldy.