Türkmenistanyň Zenanlar birleşiginiň Merkezi geňeşi gender deňligini öňe sürmekde alyp baran işleri üçin Merkezi Aziýanyň sebit ykdysady hyzmatdaşlygy (CAREC) maksatnamasynyň birinji baýragyna mynasyp boldy diýip, «nCa» internet portaly habar berýär. Türkmenistanyň Zenanlar birleşiginiň Merkezi geňeşi bütin ýurt boýunça 880 müňden gowrak zenan wekilçilik edýän bäş müňden gowrak ýerli guramany birleşdirendigi üçin ykrar edildi. Şeýle hem dabarada Türkmenistanda, Gazagystanda, Özbegistanda, Täjigistanda we Gyrgyzystanda hereket edýän «Wonder Women» halkara ulgamy hem sebit baýragyna mynasyp boldy. Baýrak gowşuryş dabarasy 29-njy noýabrda Gruziýanyň Tbilisi şäherinde CAREC-iň 22-nji ministrler maslahatynyň çäginde geçirildi. CAREC-iň bu baýragy gender deňligini, gündelik durmuşda, iş ýerlerinde we jemgyýetlerde deň hukuklary we mümkinçilikleri ösdürmekdäki ajaýyp tagallalary ykrar edýär. Ol CAREC-e agza ýurtlarda gender deňligini öňe sürmekde möhüm üstünlikleri gazananlara hormat goýmagy we sarpalamak borjuny nygtaýar.