Bütindünýä Saglygy Goraýyş Guramasy (BSGG) COVID-19 ýokanjynyň ýüze çykmagynyň sebäplerini öwrenmegini dowam etmekçi, bu barada TASS habarlar gullugyna salgylanýan «Report» neşiri ýazýar. Bu barada guramanyň baş direktory Tedros Adanom Gebreýesus täze howply patogenler boýunça hünärmenleriň ylmy-maslahat beriş toparynyň (SAGO) ýygnagynda çykyşynda aýtdy. Gebreýesus bu barada söz açyp, ýokanjyň ilkinji gezek hasaba alnan ojaklaryny, haýwandan adama geçişini çuň seljermegiň wajypdygyny belledi. Ol şeýle-de BSGG-niň ýokanjyň ýüze çykmagynyň sebäplerini anyklaýança bu işi bes etmejekdigini sözüniň üstüne goşdy. Baş direktor munuň geljekde döräp biläýjek ýokançlaryň öňüni almakda peýdaly boljakdygyny hem aýtdy diýlip, habarda bellenýär.