6-njy noýabrda Ženewada Türkmenistanda adam hukuklarynyň berjaý edilişine 4-nji Ählumumy döwürleýin syn beriş çäresi geçiriler. Adam hukuklary boýunça geňeşiň iş toparyna Malaýziýanyň, Çernogoriýanyň we Sudanyň wekilleri girdi. Türkmenistanyň wekiliýetine daşary işler ministriniň orunbasary Wepa Hajyýew ýolbaşçylyk eder. Türkmenistandan başga-da, 6-njy noýabrdan 17-nji noýabr aralygynda geçiriljek sessiýa döwründe Ählumumy döwürleýin synyň iş topary ýene on üç ýurduň milli hasabatlaryny gözden geçirer. Ählumumy döwürleýin syn BMG-niň gatnaşyjy ýurtlarynyň adam hukuklarynyň berjaý edilişi baradaky hasabatlarynyň yzygiderli barlagydyr. Ählumumy döwürleýin synyň iş topary Adam hukuklary boýunça geňeşiň 47 gatnaşyjy döwletiniň wekillerinden ybarat bolýar. Geňeşiň birinji mejlisinden bäri eýýäm üç syn döwri geçdi.