Türkmenistan we Türkiýe Hazaryň we Gara deňizleriň üstünden geçýän ulag geçelgeleriniň netijeliligini ýokarlandyrmak barada ylalaşdylar. Muny Türkmenistanyň Prezidenti Serdar Berdimuhamedow Ankarada geçirilen Türkmen-türk işewürlik forumynda aýtdy diýip, «Report.az» habar berdi. «Iki ýurduň arasynda söwdany ösdürmekde üstaşyr ýük daşamalar ulgamynda hyzmatdaşlygy çuňlaşdyrmagyň möhüm orny tassyklanyldy. Şunuň bilen baglylykda, bar bolan ulag geçelgeleriniň, hususan-da, Hazarüsti hem-de Hazar deňzi — Gara deňiz ulag geçelgeleriniň işjeňligini ýokarlandyrmagyň we täze ugurlary döretmegiň özara bähbitli boljakdygy nygtaldy» diýip, TDH Türkmenistanyň Prezidenti Serdar Berdimuhamedowyň sözleri getirýär. «Biz Hazar deňziniň üsti bilen Türkmenistandan gazyň we energiýanyň Türkiýä nädip iberilip bilinjekdigi barada pikir alyşdyk. Bu üstaşyr sebitdäki hyzmatdaşlygy gowulandyrmak iki ýurduň arasyndaky söwda gatnaşyklaryny gowulandyrmakda möhüm orun eýeleýär. Häzirki ulag geçelgesiniň, hususan-da Hazarüsti we Hazar-Gara deňzi geçelgeleriniň netijeliligi gowulaşmaga kömek edip biler. Täze ugurlar özara bähbitlere laýyklykda döredilip bilner. Bu ugurda degişli çäreleri görmek barada pikir alyşdyk we ylalaşdyk» diýip, çeşme Türkiýäniň Prezidenti Rejep Taýyp Ärdoganyň sözlerine salgylanýar. Ozal Türkmenistanyň Türkiýäni elektrik energiýasy bilen üpjün etmek üçin täze elektrik bekedini gurjakdygyny habar beripdik.