Yslamabat tarapyndan döredilen Maýa goýumlara ýardam etmek boýunça ýörite geňeşiň (SIFC) Ýokary komiteti Pakistanyň Daşary Işler Ministrligine we Nebit departamentine Saudi Aramco-nyň we Pakistan State Oil nebitgaz kompaniýasynyň, şeýle-de TOPH gaz geçirijisiniň meselelerini çözmegi çaltlaşdyrmagy tabşyrdy. Bu barada Business Recorder-e salgylanyp, ORIENT habar berýär. SIFC komiteti, aýratynam, TOPH taslamasy we beýleki ileri tutulýan taslamalar boýunça bellenilen möhletde anyk netijeleri gazanmak boýunça tabşyryklary berdi. 2023-nji ýylyň 30-njy noýabryna çenli şular baglaşylmaly: kabul edýän ýurduň hökümeti bilen şertnama (HGA); Gaz daşamak barada şertnama; Turbogeçiriji ulgamyň düzgünleri we beýlekiler. Şeýle-de, komitet Nebit, senagat we önümçilik ministrinden we Maliýe ministrinden senagatyň, elektrik energiýasynyň önümçiliginiň, söwda we durmuş sarp edijileriniň zerurlyklary üçin durnukly gaz üpjünçiligini üpjün etmek boýunça işleriň gidişi barada hasabat sorady. Ministrler derejesinde Türkmenistandan elektrik energiýasyny satyn almagyň mümkinçiliklerini we mehanizmini öwrenmek üçin gepleşikleriň geçiriljekdigi, şeýle-de Azerbaýjandan/Türkmenistandan gazyň “çalşyrma” üpjünçiliginiň mümkinçiliklerine hem garaljakdygy habar berilýär.