«Saglygy goraýyş, bilim we sport Berkarar döwletiň täze eýýamynyň Galkynyşy döwründe» atly halkara serginiň we ylmy maslahatyň çäginde Astrahan döwlet uniwersitetiniň rektorynyň halkara gatnaşyklar boýunça orunbasary Angelina Fadina Magtymguly adyndaky Türkmen döwlet uniwersitetinde jemleýji iş duşuşygyny geçirdi. W.N.Tatişew adyndaky Astrahan döwlet uniwersiteti bilen Magtymguly adyndaky Türkmen döwlet uniwersitetiniň arasynda, esasan hem, akademiki alyş-çalyş maksatnamalary, goşa diplomlary we ýokary okuw kurslary durmuşa geçirmek boýunça hyzmatdaşlygy ösdürmegiň ýol kartasy ara alnyp maslahatlaşyldy. — Biz Magtymguly adyndaky Türkmen döwlet uniwersitetinde zähmet çekýän kärdeşlerimize täze hünärler, şol sanda jemgyýetçilik işlerinde bilim we usulyýet goldawyny guramakda kömek bermäge taýýar. Astrahan döwlet uniwersiteti hemişe hyzmatdaş uniwersitetine goldaw bermäge taýýardyr — diýip, Astrahan döwlet uniwersitetiniň rektorynyň halkara gatnaşyklar boýunça orunbasary belledi. Mundan başga-da, Magtymguly adyndaky Türkmen döwlet uniwersitetine eden saparynyň çäginde Angelina Fadina pedagogika, psihologiýa, botanika we biologiýa hünärleriniň mugallymlary bilen duşuşdy hem-de bu ýöriteleşdirilen ugurlarda bilim maksatnamalaryny durmuşa geçirmekde toplan tejribesini paýlaşdy.