10-njy oktýabrda Söwda-senagat edarasynyň sergiler merkezinde Türkmenistanda giňden bellenilýän Saglygy goraýyş we derman senagaty işgärleriniň gününe gabatlanyp geçirilýän «Saglygy goraýyş, bilim we sport Berkarar döwletiň täze eýýamynyň Galkynyşy döwründe» atly halkara serginiň we onuň çäklerindäki ylmy maslahatyň birinji güni geçirildi. Saglygy goraýyş we derman senagaty ministrligi hem-de Söwda-senagat edarasy tarapyndan bilelikde guralan bu ýöriteleşdirilen sergide ýurdumyzyň saglygy goraýyş ulgamynyň ösüş depgini, Türkmenistanyň lukmançylyk ylmynda we senagatynda, ilatyň saglygyny goramakda ýeten sepgitleri, ägirt uly kuwwaty, daşary ýurtly hyzmatdaşlaryň bu ulgamdaky işjeň gatnaşyklara barha artýan gyzyklanmalary öz beýanyny tapdy. Türkmenistanyň Söwda-senagat edarasynda guralan sergä dünýäniň 20-den gowrak ýurdundan lukmançylygyň dürli ulgamlaryndaky wekiller gatnaşýarlar. Olaryň arasynda derman serişdelerini, lukmançylyk enjamlaryny we sarp ediş serişdelerini, dürli lukmançylyk hyzmatlaryny hödürleýän, tebigy kosmetiki önümleriň giň görnüşlerini, çaga iýmitini öndürýän daşary ýurt kompaniýalarynyň 150-den gowragy, şol sanda Russiýadan, Gazagystandan, Özbegistandan, Gruziýadan, Germaniýadan, ABŞ-dan, Fransiýadan, Italiýadan, Beýik Britaniýadan, Awstriýadan, Polşadan, Türkiýeden, Hindistandan, Hytaýdan we beýleki ýurtlardan kompaniýalar gatnaşýarlar. Günüň ikinji ýarymynda Söwda-senagat edarasynyň maslahatlar zalynda “Saglygy goraýyş, bilim we sport Berkarar döwletiň täze eýýamynyň Galkynyşy döwründe” atly halkara ylmy maslahatyň açylyşy boldy. Şeýle hem şu ýylda sanly ulgam arkaly geçirilen ýaş alymlaryň «Ýokary tehnologiýalar we innowasion işläp taýýarlamalar» atly halkara bäsleşiginiň jemi jemlendi. Bäsleşige Azerbaýjandan, Belarusdan, Gazagystandan, Gruziýadan, Hytaýdan, Malaýziýadan, Özbegistandan, Russiýa Federasiýasyndan, Täjigistandan, Türkiýeden we Wýetnamdan ýaş alymlar we hünärmenler möhüm ugurlar boýunça özleriniň ylmy işlerini we taslamalaryny hödürlediler. Utgaşykly görnüşde geçirilen ylmy maslahata daşary ýurtlaryň birnäçesiniň ady belli alym-professorlary, ylymlaryň doktorlary, saglygy goraýyş, bilim we sport ulgamlarynyň wekilleri gatnaşdylar. Halkara ylmy maslahatynyň işi Saglygy goraýyş we derman senagaty ministrliginiň iri edaralarynda — Kardiologiýa ylmy-kliniki merkezli hassahanada, Ýokanç keselleri merkezleri müdiriýetinde, Enäniň we çaganyň saglygyny goraýyş ylmy-kliniki merkezinde, Arkadag şäheriniň Saglyk öýünde, Arkadag şäheriniň Köpugurly hassahanasynda, Gaýragoýulmasyz tiz kömek merkezinde, Jemgyýetçilik saglygy we iýmit merkezinde hem-de paýtagtymyzyň ýokary okuw mekdeplerinde geçiriljek 15 bölümde 12-nji oktýabra çenli dowam eder. Forumyň çäklerinde Garaşsyzlyk seýilgähindäki «Aşgabat» aýdym-saz merkezinde sungat ussatlarynyň konserti boldy.