Şu gün Azerbaýjanyň Şuşa şäherinde Ykdysady Hyzmatdaşlyk Guramasyna (YHG) agza ýurtlaryň Ministrler geňeşiniň 27-nji mejlisi öz işine başlaýar. «Report.az» habarlar portalynyň ýazmagyna görä, çärä Ykdysady Hyzmatdaşlyk Guramasyna agza ýurtlaryň daşary işler ministrleri gatnaşar. Duşuşykda 2023-nji ýylda ýerine ýetirilen işleriň netijeleri we guramanyň gün tertibindäki häzirki möhüm meseleler ara alnyp maslahatlaşylar diýlip, habarda aýdylýar. Ykdysady Hyzmatdaşlyk Guramasynyň Türkmenistany, Azerbaýjany, Owganystany, Eýrany, Gazagystany, Gyrgyzystany, Pakistany, Täjigistany, Türkiýäni we Özbegistany öz içine alýan sebitara hökümetara ykdysady gurluşdygyny bellemek gerek. Ozal 13-14-nji oktýabrda Şuşada Türki medeniýetiň halkara guramasynyň (TÜRKSOÝ) ýurtlarynyň medeniýet ministrleriniň Hemişelik geňeşiniň 40-njy mejlisiniň geçiriljekdigini habar beripdik.