III «Gorkut Ata» türki dünýäniň kino festiwalynyň çäginde Baku şäherinde türki dilli döwletleriň kino ussatlarynyň ýokary derejeli duşuşygy geçirildi. Azerbaýjanyň internet neşiriniň habar bermegine görä, duşuşyga Azerbaýjanyň, Türkiýäniň, Gazagystanyň, Gyrgyzystanyň, Türkmenistanyň we Özbegistanyň wekilleri gatnaşdylar. Duşuşygyň dowamynda edilen çykyşlarda «Gorkut Ata» kino festiwalynyň türki dilli döwletlerde kino sungatyny ýokary derejä çykarmakdaky ähmiýeti aýratyn ygtaldy. Mundan başga-da, duşuşykda türk halklary gurşap alýan meseleleriň kino lentalarynda şöhlelendirilişi, bu sungaty ösdürmekde bilelikdäki hyzmatdaşlygy ösdürmek boýunça öňde durýan wezipeler ara alnyp maslahatlaşyldy.