Türkmenistandan Ilima Guseýnowa Kambojanyň paýtagtynda — Pnompen şäherinde geçýän 14 ýaşa çenli ýetginjekleriň arasyndaky Aziýa çempionatyna şowly başlady. Türkmenistanly gyz ITF Asian Junior Championship atly ýaryşyň birinji tapgyrynda hindistanly Surýanşi Şekhabaty ýeňlişe sezewar etdi. Bu ýaryşda Aziýanyň we Okeaniýanyň öňdebaryjy tennisçileriniň 24-siniň bäsleşýändiklerini ýatladýarys. Şolaryň arasynda «Aşgabat» tennis akademiýasynda Mirali Gasanowyň ýolbaşçylygynda kämilleşýän Ilima Guseýnowanyň bolmagy tennis boýunça milli mekdebimiziň sazlaşykly ösüşinden nyşandyr. Zehinli gyz Aziýanyň 14 ýaşa çenli ýetginjek gyzlarynyň reýtinginde 13-nji orny eýeleýär.