Argentinada geçirilýän FIFA U-20 Dünýä Kubogynyň finalyna çykan toparlar belli boldy. Çekeleşikli geçen ýarym final oýunlaryndan soň Urugwaý bilen Italiýanyň U-20 topary finalda oýnamaga hukuk gazandy. Final duşuşygy 11-nji iýunda La Plata şäherindäki Diego Armando Maradona adyndaky stadionda oýnalar. Ýarym finalda Urugwaý bilen Ysraýylyň ýaşlar ýygyndylary duşuşdy. Çekeleşikli geçen oýunda Urugwaýyň ýaşlar ýygyndysy 1:0 hasabynda ýeňiş gazandy. Günorta amerikalylara ýeňiş getiren ýeke-täk goly 61-nji minutda Nataniel Duarte geçirdi. Urugwaýyň ýygyndysy 1997-nji we 2013-nji ýyllardan soň 3-nji gezek finala çykdy. Beýleki ýarym finalda-da Italiýa bilen Günorta Koreýanyň ýaşlar ýygyndylary duşuşdy. 21 müňe golaý janköýeriň tomaşa eden oýnunda italýanlar ýaryşyň ýyldyzy Çezare Kasadei 14-nji minutdaky goly bilen 1:0 öňe saýlandy. Koreýler 23-nji minutda Li Syn-wonuň penaltiden geçiren goly bilen hasaby deňlediler. Italýanlara ýeňiş getiren goly-da oýnuň tamamlanmagyna 4 minut galanda, Simone Pafundi öz adyna ýazdyrdy. Şunlukda, 2:1 hasabynda ýeňiş gazanan Italiýanyň U-20 ýygyndysy ilkinji gezek finala çykmagy başardy. Italiýanyň ýygyndysy 2017-nji ýylda 3-nji, 2019-njy ýylda-da 4-nji ýeri eýeläpdi. Urugwaý bilen Italiýanyň U-20 ýygyndylarynyň arasyndaky final duşuşygy 11-nji iýundan 12-nji iýuna geçilýän gije Aşgabat wagty bilen 02:00-da başlar. Bu duşuşykdan öňem 22:30-da başlanjak bürünç medal ugrundaky duşuşykda Ysraýyl bilen Günorta Koreýanyň U-20 ýygyndylary özara güýç synanyşar.