Säher tutup, syl ýüzüňe çagaňy,

Päkligiňden bolup bilseň şonça bol.

Sen sanama gara saçyň agyny,

Sen sag-aman öreniňe monça bol.

***

Biz hemmämiz şatlyk üçin doguldyk,

Şoň üçinem geçdik, ine, şunça ýol.

Şat günleriň köp bolmanna gynanma,

Şat günleriň bolanyna monça bol.

***

Goňşyňy gozgama, göçmesin goňşyň,

Goý, öçmesin, sen ölçerme oduny.

Aýaklaryň ätjek ädimi äder,

Göreçleriň görer görjek zadyny.

***

Säher turup, syl ýüzüňe dünýäni,

Giňligiňden bolup bilseň şonça bol.

Bu dünýäňe mahsus ähli zatlaryň

Senden sowlup geçmeýänne monça bol.

***

Erbet bor bu baglar geçse deňiňden,

Bu ýagyşlar seniň üçin ýagmasa.

Bagy ikiýana bulanda tupan,

Zerur ýygy ýüzleriňe degmese.

***

Gykuwlaşyp geçip gitse deňiňden,

Durnalaryň ýyllar kimin hatary.

Seni gozmagasa beýik ýaşaýşyň

Çözülen hem çözülmeli mataly.

***

Soň üçinem syl ýüzüňe dünýäni,

Özüň hakda, goňşyň hakda pikir et.

Bu dünýäňe mahsus ähli zatlaryň

Senden sowlup geçmeýänne şükür et.

Gurbannazar Ezizow.