OpenAI kompaniýasy ChatGPT-de söwda etmegi has ýeňilleşdirmäge ýardam berýän täze funksiýany — eşikleri we esbaplary sanly usulda geýip görmek mümkinçiligini işe girizdi. Bu aýratynlyk ulanyja öz boýdan-başa düşen suratyny ýükläp, saýlan geýiminiň özüne nähili gelişjekdigini görmäge şert döredýär. Harytlaryň gözleg netijelerinde «Synap görmek» düwmesi peýda bolýar. Munuň üçin eşigi gönüden-göni ChatGPT arkaly gözlemek hem hökman däl. Ulanyjy dükanyň internet sahypasyndaky geýimiň suratyny ýa-da onuň ekran şekilini ýükläp, şol lybasyň özüne nähili gelişjekdigini görkezip bermegi haýyş edip biler. Suratlary döretmek üçin OpenAI kompaniýasynyň sentýabr aýynda tanyşdyran ChatGPT Images 2.5 modeli ulanylýar. Kompaniýanyň aýtmagyna görä, bu model suratlary redaktirlemekde has kämil we düýpli işleýär, ýagtylygy tebigy görkezýär hem-de suratlary tiz taýýarlaýar. Mundan ötri, çat-bota halanan harytlary ýatda saklatmak üçin «Saýlananlar» bölümi goşuldy. Ulanyjylar özlerine ýaran harytlary ýörite bölümde saklap, soňra olara täzeden dolanybam biler. Eşigiň egniňde synap görlen suratlary hem şol ýerden alyp bolýar. Mundan başga-da, ChatGPT ulanyjynyň isleýän lybas biçüwine görä egin-eşik saýlap biler ýa-da meşhur adamlaryň geýen eşikleriniň suratlary esasynda olara meňzeş geýimleri gözläp tapmaga kömek edýär.