«Uly ýediligiň» (G7) ýurtlary Halkara energetika agentligi bilen bilelikde dört aýyň dowamynda strategik gorlarynda saklanýan 100 million barrel nebit we nebit önümlerini bazara çykarmak barada ylalaşdylar. Bu barada G7 ýurtlarynyň liderleriniň bilelikdäki beýannamasynda aýdylýar. Esasy üns dizel ýangyjynyň ýetmezçiligini aradan aýyrmaga gönükdiriler. Bu ýangyjyň ep-esli mukdary eýýäm ilkinji 20 günüň dowamynda bazara çykarylar. Bahalaryň birden ýokarlanmagynyň öňüni almak maksady bilen, ylalaşyga gatnaşýan ýurtlar nebiti gaýtadan işleýän zawodlarda abatlaýyş işleriniň tertibini özara ylalaşmagy we energiýa serişdeleriniň söwdasyna çäklendirme girizmezligi karar etdiler. Bu çözgüde bellibir derejede Waşingtonyň basyşy täsir etdi. «Reuters» agentliginiň habar bermegine görä, ABŞ Fransiýadan we Germaniýadan dizel ýangyjynyň bahasyny peseltmek maksady bilen adatdan daşary ätiýaçlyklaryny dessin ulanmaga başlamagy talap edipdir. Eger talap berjaý edilmedik ýagdaýynda, ABŞ bu ýurtlara ýangyç eksport etmegi gadagan etjekdigini duýdurypdyr.