Beýik Britaniýada Warner Bros. studiýasynda ýaş jadygöý Garri Potter barada serial surata düşürilip başlandy. J. K. Roulingiň ýedi kitabyny öz içine aljak serialyň premýerasy 2027-nji ýyla meýilleşdirilýär diýip, Warner Bros. we taslamanyň önümçiligine jogap berýän HBO teleýaýlymy habar berdi. HBO Instagram-da surata düşüriş meýdançasyndan ilkinji suraty paýlaşdy. Onda Garri Potteriň keşbi üçin tassyklanan aktýor Dominik Maklaflin serialyň baş gahrymanynyň obrazynda dur. Ol elinde 2025-nji ýylyň 14-nji iýuly senesini görkezýän numeratory saklaýar. Mundan başga-da, HBO ozal atlandyrylmadyk käbir keşpleri ýerine ýetirijileriň atlaryny yglan etdi. Şeýlelikde, Newilli (Garriniň topardaşy) Rori Uilmot, doganoglany Dadli Dursly – Amos Kitson, hanym Rolanda Trýugy – Luiza Brili, Garrik Olliwanderi bolsa Anton Lesser oýnar. HBO Garri Potter älemi boýunça serialyň üstünde işleriň başlanjakdygyny 2023-nji ýylda yglan etdi. Döredijiler onuň “meşhur kitaplaryň takyk uýgunlaşmasynyň” boljakdygyny belledi. 2024-nji ýylyň güýzünden bäri şourannerler baş gahrymanlar üçin aktýorlary gözledi. Açyk kastinge 30 müňden gowrak çaga gatnaşdy. Baş keşpler üçin aktýorlar 2025-nji ýylyň ýazynda saýlandy. Germiona Greýnjeriň we Ron Uizliniň keşplerini Arabella Stenton we Alaster Staut ýerine ýetirýär. Beýik Britaniýada serialy surata düşürmek üçin kiçi şäher gurulýar. Ol 1 mlrd funt sterlinge (1,25 mlrd dollar) düşer. Bu ýerde aktýor çagalar bilim almagyny dowam etdirip biler ýaly kiçi mekdep bolar.