17-nji iýunda Parižde Halkara sergiler býurosynyň (BIE) agza ýurtlarynyň wekiliýetleriniň gatnaşmagynda Guramanyň Baş Assambleýasynyň 176-njy sessiýasy geçirildi. Mejlisiň gün tertibine halkara we ýöriteleşdirilen sergileri geçirmek bilen baglanyşykly meseleler girizildi. Bu çärede Türkmenistana BIE-niň ýanyndaky hemişelik wekili, ilçi Maksat Çaryýewiň ýolbaşçylygyndaky wekiliýet bilen wekilçilik etdi. Wekiliýetiň düzümine Türkmenistanyň Söwda-senagat edarasynyň başlygy Mergen Gurdow we edara degişli sergiler we ýarmarkalar bölüminiň başlygy Kemal Amanow girdi. Sessiýanyň dowamynda BIE-niň Administratiw we býujet komitetiniň, ýerine ýetiriji, hukuk, maglumat we kommunikasiýa komitetleriniň hasabatlary diňlenildi. Açylyş dabarasynda Administratiw we býujet komitetiniň başlygy Karen-Mae Hill 2025-nji ýylyň 17–19-njy marty aralygynda Aşgabatda geçirilen komitetiň mejlisini ýatlap, Türkmenistanyň Hökümetine minnetdarlyk bildirdi. Ol bu mejlisiň BIE-niň taryhynda Parižiň çäginden daşary ilkinji gezek geçirilendigini belläp, onuň guramanyň halkara gatnaşyklaryndaky ähmiýetine ünsi çekdi. Sessiýanyň çäklerinde agza ýurtlaryň wekiliýetleri Saud Arabystanynyň Er-Riýad şäherinde geçiriljek “Expo 2030”, Belgraddaky “Expo 2027” hem-de Ýaponiýanyň Ýokogama şäherindäki 2027-nji ýylyň Halkara bagçylyk sergisine görülýän taýýarlyklar boýunça hasabatlary hödürlediler. Pariždäki duşuşyklaryň dowamynda türkmen wekiliýeti BIE-niň ýolbaşçylary we agza ýurtlaryň wekilleri bilen duşuşyklary geçirip, sergi hyzmatdaşlygyny giňeltmek we milli başlangyçlary öňe sürmek boýunça pikir alyşdy.