Ilon Mask täze nesil XChat messenjeriniň işe girizilendigini habar berdi. Programma Telegram we WhatsApp ýaly meşhur platformalaryň ornuny tutup biljek messenjer hökmünde görkezilýär. Täze messenjeriň beta-wersiýasy eýýäm tölegli ýazylyşyk bilen X sosial ulgamynyň käbir ulanyjylary üçin elýeterli boldy. XChat-yň esasy funksiýalarynyň arasynda ähli habarlaryň we jaňlaryň awtomatik şifrlenmegi, islendik formatly faýllar bilen paýlaşmak, X platformasy bilen baglanyşyk (şol sanda, bada-bat tölegler we çat-botlar), şeýle-de dürli gurluşlarda işläp bilmegi bar. Programma iOS, Android we kompýuter üçin elýeterlidir. Şifrlemegi diňe “gizlin çatlarda” ulanýan Telegram-dan tapawutlylykda, XChat ony aragatnaşygyň ähli görnüşleri üçin awtomatik ulanýar. Şeýle-de, messenjeriň foto we wideo redaktirlemek üçin gurallary bar, EA kömekçisi bolsa duşuşyklary meýilleşdirmäge we hatlary seljermäge kömek edýär. X platformasy bilen baglanyşyk ulanyjylara Maskyň beýleki taslamalary, mysal üçin, SpaceX we Tesla bilen göni programma arkaly aragatnaşyk saklamaga mümkinçilik berýär. Goşundynyň interfeýsi sada we düşnükli bolup, bu ony giň köpçülik üçin amatly edýär. Anonsdan soň XChat eýýäm internet torunda işjeň gürrüňlere getirdi. Käbir bilermenler onuň messenjer bazarynda öňdebaryjy oýunçy bolup biljekdigini çaklaýar. Onuň üstünligine ýardam edip biljek şertleriň arasynda – Ilon Maskyň abraýy, hyzmatyň hemmeler üçin niýetlenmegi, köp dilleri goldamagy we esasy funksiýalaryň mugt bolmagy bar. XChat-yň işe girizilmegi wagt taýdan Maskyň xAI kompaniýasynyň Grok çat-botunyň Telegram-a goşulyp biljekdigi baradaky habar bilen gabat geldi. Ýöne Telegram-yň esaslandyryjysy Pawel Durowdan tapawutlylykda, Maskyň özi kompaniýalaryň arasynda ylalaşyk gazanylandygy barada habar bermäge howlukmaýar.