2025-nji ýylyň birinji çärýeginde Xiaomi kompaniýasy dakylýan enjamlaryň dünýä boýunça ibermeleriniň sany boýunça birinji orna çykyp, Apple-y yzda galdyrdy. Canalys analitikleriniň maglumatlaryna görä, kompaniýa 8,7 million enjam iberipdir, bu bolsa geçen ýylky bilen deňeşdirilende 44% köp. Şeýlelikde, Xiaomi bazaryň 19%-ini eýeledi. Bu üstünlikde esasy rol 2014-nji ýylda çykarylan we şondan bäri meşhurlygyny ýitirmedik arzan «Mi Band» fitnes-bileziklerine degişli boldy. Apple 7,6 million «Apple Watch» satyp, 16% bazar paýy bilen ikinji orunda ýerleşdi. Onuň ibermeleriniň ösüşi bary-ýogy 5% boldy. Üçünji orunda Huawei – 7,1 million enjam we 15% paý. Samsung iň ýokary ösüş görkezen kompaniýa boldy – 74% ösüş bilen 4,9 million enjam iberip, 11% bazar paýyna ýetdi. Garmin bolsa 1,8 million enjam (4%) bilen bäşligi jemledi. Geçen çärýekde jemi 46,6 million dakylýan enjam iberildi, bu bolsa geçen ýylky bilen deňeşdirilende 13% köp. Iň meşhur enjamlar ýönekeý fitnes-bilezikler we esasy sagatlar boldy. Soragnamalara görä, alyjylar üçin iň möhüm zat – enjamyň bahasy bolup durýar, ondan soň batareýasynyň ömri we saglyk bilen baglanyşykly funksiýalar gelýär.