Samsung kompaniýasy resmi taýdan täze Galaxy S25 Edge smartfonyny hödürledi – bu hatarda iň inçe smartfondyr. Smartfonyň ýogynlygy 5,85 mm, agramy 163 g barabar. Ol täzelenme ýygylygy 120 Gs çenli bolan 6,7 dýuýmlyk QHD+ displeýine eýe boldy. Çalt hereketli sahnalary has aýdyň görkezmek üçin bolsa ProScaler tehnologiýasynyň goldawy bar. Ekran Corning Gorilla Glass Ceramic 2 aýnasy bilen goraldy we titan çarçuwa eýe boldy. Yzky panel Gorilla Glass Victus 2 aýnasyndan ýasaldy. Smartfon IP68 ülňüsine laýyk gelýär. Ekranda ultrasesli barmak yzynyň skaneri ýerleşdirildi. Frontal kamera – 12 Mp. Esasy kamera iki sany: optiki durnuklaşdyrma bilen 200 Mp we giňburçly 12 Mp. Kamera awtomatik sazlamak üçin ProVisual Engine EA tehnologiýasyny ulanýar, Adaptive Pixel funksiýasy bolsa reňk takyklygyny ýokarlandyrýar. Şeýle-de, gowşak ýagtylykda suratyň hilini gowulandyrýan Galaxy Nightography tehnologiýasy bar. Smartfon Snapdragon 8 Elite prosessory, 12 GB operatiw ýat we 256 ýa-da 512 GB saklaýjy bilen üpjün edildi. Korpusyň inçe bolmagy üçin öndüriji akkumulýator batareýasynyň sygymyndan geçmeli boldy – 25 Wt kuwwatly (Galaxy S25 hatarynyň beýleki wekillerinde 45 Wt) zarýad alyş bilen bary-ýogy 3900 mA/sag. Şeýle-de bolsa, Samsung gurluşyň energiýa tygşytlaýyş ulgamlarynyň netijesinde ýokary awtonomlygy üpjün edýändigini nygtaýar. Galaxy S25 Edge smartfony Galaxy AI bukjasyndan Circle to Search, Now Bar, Now Brief ýaly EA funksiýalaryny, şeýle-de Audio Eraser, Object Eraser we Sketch to Image redaktirleme gurallaryny goldaýar. Köp funksiýalar oflaýn režimde hem elýeterlidir. Smartfon One UI 7 interfeýsi bilen Android 15-de işleýär, 5G, Wi-Fi 7 we Bluetooth 5.4 goldawy bar. Alyjylar üçin korpusyň gara, gök we çal reňkleri elýeterli. Smartfonyň bahasy 256 GB üçin 1249 ýewro we 512 GB üçin 1369 ýewro.