ABŞ-nyň administrasiýasy 2030-njy ýyla çenli Halkara kosmos stansiýasynyň ulanylyşyny bes etmegi meýilleşdirýär. Bu barada ýurduň 2026-njy ýyl üçin býujet taslamasynda aýdylýar. Resminama görä, HKS üçin çykdajylar 508 mln dollar azaldylar. Bu ekipažyň sanynyň we ylmy gözlegleriň möçberiniň azalmagy bilen baglanyşyklydyr. NASA serişdeleri HKS-iň işi tamamlanandan soň onuň ornuny tutjak täjirçilik orbital stansiýalaryny döretmäge gönükdirmegi meýilleşdirýär. Ak tamda NASA-nyň Aýy we Marsy özleşdirmek üçin halkara hyzmatdaşlar bilen gatnaşyga üns berjekdigi aýdylýar. Stansiýany ulanylyşdan aýyrmagyň gutarnykly möhleti heniz tassyklanmadyk. ABŞ 2030-njy ýyly göz öňünde tutýar, Russiýa bolsa taslamany eýýäm 2028-nji ýylda ýapmagy meýilleşdirýär. HKS 1998-nji ýylyň 20-nji noýabryndan bäri orbitada ýerleşýär. Ýigrimi ýyldan gowrak wagtyň içinde ol kosmosda ylmy tejribeler üçin iň uly halkara platformasyna öwrüldi. Taslama bäş esasy hyzmatdaş gatnaşýar: ABŞ, Russiýa, Kanada, Ýaponiýa, şeýle-de Ýewropa kosmos agentligi. Bu agentligiň düzümine bolsa Belgiýa, Germaniýa, Daniýa, Ispaniýa, Italiýa, Niderlandlar, Norwegiýa, Fransiýa, Şwesiýa we Şweýsariýa girýär.