Tesla kompaniýasy «Cybercab» sürüjisiz elektromobilini Ýewropa bazaryna çykarmak boýunça ilkinji resmi ädimini ätdi. Ýewropanyň patent edarasynyň berýän maglumatlaryna görä, şu ýylyň 9-njy aprelinde bu modeliň dizaýnyny hasaba aldyrmak üçin ýüz tutulypdyr. Dizaýn şekilleri 15-nji aprelde elýeterli boldy diýip, «32Cars» habar berýär. «Cybercab» – doly awtonom elektrikli awtoulag bolup, ol iki ýolagçy gatnatmak we köp mukdarda ýük daşamak üçin niýetlenendir. Ölçegleri boýunça «Model Y» ulagyna meňzese-de, ol diňe sürüjisiz robotlaşdyrylan ulag hyzmatlaryna niýetlenýär. Niderlandlaryň Infrastruktura ministrliginiň häzirki meýilnamalaryna görä, awtonom ulag hyzmatlary 2027-nji ýylda ýurtda kanuny taýdan işe girizilip bilner. Bu bolsa «Cybercab-yň» ÝB bazaryna çykmagyna ýol açar. Eger-de taslama tassyklansa, Tesla ýewropaly müşderilere şäher içindäki karşering we awtonom taksi hyzmatlary üçin niýetlenen innowasion elektrikli ulag çözgüdini hödürläp biler.