Nissan 2025-nji ýylyň maý aýyndan iýul aýy aralygynda Kýusýudaky (Ýaponiýa) zawodynda Rogue krossoweriniň önümçiligini 13 000 birlik azaldar. Bu barada Reuters agentligi habar berýär. Bu markanyň ABŞ-da iň köp satylýan modeli. 2025-nji ýylyň birinji çärýeginde Nissan ýurtda 62 000 Rogue awtomobilini satdy, olaryň köpüsi Ýaponiýada ýygnaldy. Kompaniýa Ştatlarda import awtomobiller üçin 25 göterim gümrük paçlarynyň girizilmegi sebäpli modeliň ýygnalmagyny wagtlaýyn togtatmak kararyna geldi. Kýusýudaky zawod iki çalşykda işlemegini dowam eder, ýöne käbir günler işlemez. Nissan paç ýagdaýlaryna baglylykda iýul aýyndan soň önümçilik möçberine gaýtadan seretmegi meýilleşdirýär. Şol bir wagtyň özünde, kompaniýanyň Tennesside (ABŞ) hem Rogue modelini ýygnaýan zawody bar. ABŞ Nissan üçin esasy bazar bolmagynda galýar. 2024-nji ýylda ABŞ-da 246 müň Rogue krossoweri satyldy. Bu Nissan-yň amerikan bazaryndaky satuwynyň dörtden birinden gowragydyr. Reuters-iň maglumatlaryna görä, logistikadaky üýtgeşmeler üpjünçiligiň gijikdirilmegine we bahalaryň üýtgemegine getirip biler. Alyjylara modelleriň elýeterliliginde bolup biljek bökdençlikleri göz öňünde tutmak maslahat berilýär. Ozal häzirki söwda dartgynlylygy sebäpli Mitsubishi kompaniýasy ABŞ-nyň diler merkezlerine ulag ibermegini togtatdy. Şeýle çäreler barada Audi, Volkswagen, Jaguar Land Rover we Volvo hem habar berdi.