ABŞ-nyň taryhynda ilkinji gezek ýel we Gün ýaly gaýtadan dikeldilýän energiýa çeşmeleri kömürden köp elektrik energiýasy öndürdi diýip, «The Verge» neşiri habar berýär. «Ember» analitika merkeziniň berýän maglumatlaryna görä, 2024-nji ýylda kömür energiýasynyň paýy rekord derejede 15%-e düşdi, ýöne şol bir wagtda ýel we Gün energiýasynyň paýy 17%-e ýetdi. Gün energiýasy ABŞ-da iň çalt ösýän elektrik çeşmesine öwrülip, täze gurlan energiýa kuwwatlyklarynyň 81%-ini üpjün etdi. 2024-nji ýylda onuň kuwwaty rekord derejede – 31 GWt artdy. Şeýle-de ABŞ-da Gün panellerini öndürýän kärhanalaryň kuwwaty hem 190% ýokarlandy. Bu ugurda öňdeligi eýelän ştat bolsa, nebit-gaz senagaty bilen tanalýan Tehas boldy. Ýel energiýasy has pesräk ösüş gazananam bolsa, ol henizem ýurduň elektrik energiýasynyň, takmynan, 10%-ini üpjün edýär. Şeýlelikde, gaýtadan dikeldilýän energiýa çeşmeleri ABŞ-nyň taryhynda ilkinji gezek kömürden köp energiýa öndürmäge mümkinçilik berdi. Ösüşiň nähili depginde öňe barýandygyny deňeşdirmek islesek, 2018-nji ýylda kömürden alnan energiýanyň, bu iki çeşmäniň şol wagt öndüren umumy energiýasyndan üç esse köp bolandygyny belläp geçmek ýeterlik bolar.