2025-nji ýylyň 23 — 27-nji fewralynda Aşgabat şäherinde Owganystanyň önümleriniň sergisini we işewürlik maslahatyny geçirmek meýilleşdirilýär. Bu çärelere görülýän taýýarlyk barada anna güni Hökümet mejlisinde wise-premýer N.Atagulyýew döwlet Baştutanyna hasabat berdi. Bellenilişi ýaly, bu çärelere goňşy ýurduň haryt öndüriji kompaniýalarynyň hem-de Türkmenistan bilen hyzmatdaşlyga gyzyklanma bildirýän işewürleriniň gatnaşmagy göz öňünde tutulýar. Serginiň we işewürlik maslahatynyň çäklerinde özara bähbitli hyzmatdaşlygy ösdürmek, ýurdumyzda öndürilýän önümleri Owganystana eksport etmek baradaky meseleleri ara alyp maslahatlaşmak meýilleşdirilýär. Serdar Berdimuhamedow ýurdumyzda Owganystanyň önümleriniň sergisiniň we işewürlik maslahatynyň geçirilmeginiň türkmen-owgan gatnaşyklaryny mundan beýläk-de ösdürmekde möhüm ädim boljakdygyny belledi. Şunuň bilen baglylykda, döwlet Baştutany bu ugurda taýýarlanylan teklibi goldap, wise-premýere degişli işleri geçirmegi tabşyrdy. Aşgabatda owgan önümleriň ilkinji sergisi 2024-nji ýylyň 4 – 6-njy martynda geçirildi. Sergide önüm öndürijiler birnäçe özara bähbitli şertnamalary baglaşyp bildiler.