Pawel Durow tarapyndan döredilen Telegram messenjeri şu gün - 14-nji awgustda 11 ýaşyny belledi diýip, IXBT habar berýär. Aragatnaşyk etmegiň goragly ulgamyny döretmek pikiri Durowda baryp 2011-nji ýylda peýda bolupdyr. Şonda ol dogany bilen aragatnaşyk etmegiň howpsuz hem ygtybarly usulyny gözläpdir. Biraz soňra Paweliň dogany - Nikolaý Durow Telegramyň häzirki wagtda ulanýan MTProto şifrli ýazyşmak tehnologiýasyny işläp düzüpdir. Telegram-yň iOS üçin ilkinji wersiýasy 2013-nji ýylyň 14-nji awgustynda hödürlenipdir. Şol ýyl hem Android, Windows we macOS üçin wersiýalar döredilipdir, şeýle hem web wersiýasy işlenip düzülipdir. 2013-nji ýylyň noýabr aýyna çenli eýýam 1 mln-a golaý ulanyjy ony ýükläp alypdyr. Telegram messenjeri täze funksiýalary we mümkinçilikleri goşup, kämilleşmegini dowam edýär. 2024-nji ýylyň iýul aýynyň ahyrynda Pawel Durow Telegramyň işjeň ulanyjylarynyň sanynyň 950 milliona ýetendigini habar berdi.