Geçen hepdäniň iň soňky güni ýene-de 2 ýyldan, has takygy 2012-nji ýylda Polşa we Ukrainada geçiriljek futbol boýunça 14-nji Ýewropa çempionatynda ýer eýelerinden başga çykyş etjek 14 topary kesgitleýän saýlama toparçalarynyň bijesi çekildiPolşanyň paýtagty Warşawanyň medeniýet merkeziniň binasynda bolup geçen dabara Ýewropa futbolynyň görnükli wekilleri, UEFA-nyň degişli ýolbaşçylary we şol sanda her milli ýygyndynyň tälimçisi gatnaşdy. Bijeleri bolsa Euro-2012-niň gurnaýjylarynyň iň meşhur ýyldyzlary çekdi. Ýagny Polşadan Zbigniew Boniek hem-de Andreý Şarmak, Ukrainadan bolsa Oleg Blohin bilen Andreý Şewçenko dagylar toparlaryň bijelerini çekdiler.
futbolchy 14 years ago- Şeýlelikde 51 milli ýygyndy 9 toparçada çykyş eder. Şol 9 toparçanyň 6-synda 6, galan 3-üsinde bolsa 5 sany milli ýygyndy özara güýç synanyşar. Ýewropa futbolynyň iň naýbaşy döwletleri 1-nji torbada bolup, olar hersi aýratynlykda dürli toparçada çykyş eder. Başgaça aýdylanda öňküleri ýaly futboly ösen iki döwlet bir toparçada çykyş etmez diýsek öte geçdigimiz bolmaz.
Toparçalar barada aýdylanda “A” toparçada Ýewropa futbolynyň iň köp çempion bolan topary Germaniýa bilen 2 ýyl öňki ýarym finalçy Türkiýe esasy faworit hasaplanýar. “B” toparçada Russiýa 1-nji torbadan gatnaşyp, olaryň esasy garşydaşy slowaklar hem-de irlandlar bolsa gerek. “C” toparçada bolsa Dünýäniň soňky çempiony italýanlar we serbler hem-de 2010 Dünýä birinjiliginde çykyş etjek Sloweniýa Polşadyr Ukrainadaky ýaryşa gatnaşmak üçin bäsleşerler. “D” toparçada bu gezegem fransuzlar bilen rumynlar duşuşar, eger-de geçen ýylky başarnygyny dowam etdiren ýagdaýynda bosniýalylar hem toparçanyň esasy dalaşgärleriniň biri bolup biler. “E” toparçada 14-nji Ýewropa çempionatynda çykyş etmek üçin Niderlandlaryň esasy garşydaşy şwedler bolar. “F” toparçada Dünýä çempionatyndan ahmyrly horwatlar gönümel gatnaşmak isleýän bolsalar esasy garşydaşlary Gresiýadyr Ysraýyldan üstün çykmaly bolar. “G” toparçanyň esasy faworiti iňlisler bolup, olar Şweýsariýanyň, Bolgariýanyň, Uelsiň hem-de UEFA-nyň täze wekillerinden Garadagyň milli ýygyndylary bilen güýç synanyşar. Bu toparçada 2 topara Çempionlar ligasyny gazanan tälimçileriň (Kapello we Hitzfeld) tälim berýänligi bellärliklidir. “H” toparçasynda Portugaliýa esasy dalaşgärem bolsa, Daniýa, Norwegiýa ýaly toparlary ýeňmeli bolar. Ýewropanyň soňky çempiony ispanlar bolsa ahyrky toparçada (“I”) çehiýaly, şotlandiýaly, litwaly hem-de lihtenşteýnli futbolçylar bilen duşuşar
Şu ýerde ýene bellemeli zatlaryň biri saýlama toparçalaryň atlary öňküler ýaly san bilen (1, 2, 3, 4) däl-de, harplar esasynda (A, B, C, D) atlandyrylýar. Saýlama toparçalaryndaky duşuşyklar 2010-njy ýylyň sentýabryndan 2011-nji ýylyň noýabryna çenli aralykda oýnalar. Duşuşyklar hepdäniň sişenbe, anna we şenbe günleri bolar. Toparçalarda 1-nji orny eýelän 9 milli ýygyndy Polşa bilen Ukrainanyň gurnaýan bu bäsleşigine gönümel gatnaşar. Toparçada 2-nji orny eýelänleriň arasynda iň köp oçko toplany-da gönümel gatnaşsa, 2-nji ýeri alan beýleki toparlar bolsa ikiçäk, iki duşuşykly pleý-off duşuşyklaryny geçirerler. Bu duşuşyklar bolsa 11-12-nji we 15 noýabrda oýnalar.
Saýlama toparçalaryndaky duşuşyklar şu tertipde geçiriler: 3-4-nji we 7-nji sentýabr, 8-9-njy we 12-nji oktýabr (2010), 25-26-njy we 29-njy mart, 3-4-nji we 7-nji iýun, 2-3-nji we 6-njy sentýabr, 7-8-nji we 11-nji oktýabr (2011).