Hormatly agzalar men size Türkmen sportunyň ussatlary bilen tanyşdyrmagy dowam edýän Farida Kutlimuradowa Berkarar döwletiň bagtyýarlyk döwründe Hormatly Prezidentimiz Gurbanguly Berdimuhamedowyň baştutanlygynda türkmen sporty dünýäniň sport ulgamynyň dürli ugurlary boýunça ynamly öňe barýar. Sport ulgamynda hem ylym-bilim, syýahatçylyk, saglyk ýaly pudaklarda bolşy ýaly düýpli ösüşler durmuşa geçirilýär. Paýtagtymyz Aşgabat halkara standartlaryna laýyk gelýän döwrebap sport toplumlaryny özünde jemläp, sportuň dürli görnüşleri boýunça halkara we sebit derejesinde abraýly ýaryşlaryň geçirilýän merkeze öwrüldi. Bu halkara derejesindäki ýaryşlara Türkmenistanyň Milli sport we syýahatçylyk institutynyň talyplary hem işjeň gatnaşýarlar. Olaryň biri-de Türkmenistanyň Milli sport we syýahatçylyk institutynyň Sport fakultetiniň ýokary derejeler sporty hünäriniň 3-nji ýyl talyby Farida Kutlimuradowadyr. Ol 1986-njy ýylyň 21-nji oktýabrynda Daşoguz welaýatynyň Daşoguz şäherinde eneden doguldy. Ony çagalykdan sportuň kik-boksing görnüşi özüne çekýärdi. Farida kik-boksinge degişli dürli sport gepleşikleri, ýaryşlary we oňa degişli çeper hem-de dokumental filmleri ürç edip görýärdi. Daşoguz şäherindäki sport mekdebiniň kik-boksing bölüminde türgenleşik geçip, dürli derejedäki ýaryşlara gatnaşyp başlady. 2012-nji ýylda Daşoguz şäheriniň 19-njy orta mekdebini tamamlap, sportuň bu görnüşi bilen çynlakaý meşgullanyp başlady. Bu yhlas ony Türkmenistanyň Milli sport we syýahatçylyk institutyna alyp geldi. Farida Kutlimuradowa 2015-nji ýylyň 20-21-nji martynda ilkinji gezek Germaniýanyň Elbern şäherinde geçirilen kik-boksing boýunça halkara ýaryşynda 60 kg agramda cykyş edip, 1-nji orna mynasyp boldy. Soňra Farida şol ýylyň 1-9-njy awgusty aralygynda geçirilen Hindistanyň Pune şäherindäki kik-boksing boýunça halkara ýaryşynda 60 kg. agramda 1-nji orny eýeläp, altyn medala mynasyp boldy. 2017-nji ýylyň mart aýynyň 25-27-i aralygynda Riga şäherinde geçirilen (Latwiýa döwleti) kik-boksing boýunça halkara ýaryşynda Full kontakt boýunça 56 kg. agramda 1-nji orna Altyn medaly we K-1 306t görnüşi boýunça 2-nji orny gazanyp, kümüş medala eýe boldy. F. Kutlimuradowa üstümizdäki ýylyň sentýabr aýynda Aşgabatda geçiriljek Ýapyk binalarda we söweş sungaty boýunça V Aziýa oýunlaryna taýýarlyk görýär. Onuň bu ýaryşlarda ýeňiş gazanyp, türkmen Tugumyzy belende göterjekdigine ynanýarys. Aziada-2017-niň türkmen ýaşlarynyň sagdynlygyny, ruhubelentligini we dostlugyny has-da berkitmekde ähmiýeti örän uludyr. Ol gelejekde hem güneşli Diýarymyzda Halkara derejesinde dostlukly ýaryşlaryň dowam etdiriljekdigine umyt berýär.