Соңкы вагтлар Интернет торуның кәбир сайтларында хич-хилли эсасландырылмадык, дашары юрт валютасының түркмен манадына болан гатнашыкда хүмметиң галяндыгы барада ялан-яшырын маглуматлар берилйәр. Шулар ялы ялан, есасландырылмадык маглуматлары чап эдйән ыкдысады дүшүнҗеси болмадык адамлара Түркменистанда алынып барылян сыясаты өвренип, ондан соңра нетиҗе чыкармаклыгы маслахат берйәрин. Түркмен дөвлети өз мукаддес Гарашсызлыгыны газанмагы билен, илкинҗи нобатда милли канунчылык улгамыны кәмиллешдирмеклик билен бир хатарда 1993-нҗы йылың 1-нҗи ноябрында түркмен милли манадыны доланшыга гойберди. Шу гүнки гүне түркмен манады улы болмадык тарыхы ёлунда базар ыкдысадыетиниң чылшырымлы дөврүнде өзүниң абрайыны, ыгтыбарлыгыны ве хүмметини сакламагы долы башарды. Шу гысга дөвүр аралыгында милли манадымыз кануны төлег серишдеси болмак билен, ыкдысады үстүнликлеримизиң ярдамчысы болды. Түркменистаның Президентиниң башда дурмагында милли манадымызың хүмметини беркитмек угрунда улы өзгертмелер дурмуша гечирилди ве гечирилмеги довам этдирилйәр.Муңа мысал эдип, 2008-нҗи йылда милли манадың дашары юрт пулунда йеке-тәк хүмметиң белленилмегини, 2009-нҗы йылың 1-нҗи январында милли манадымызың деноминасиясының гечирилмеги шейле хем, хер йылда зәхмет хакларыны, дөвлет көмек пулларыны, пенсияларың ве талып хакларының ызыгидерли 10% артдырылмагы ялы өзгертмелери гөркезмек болар. Шейле ыкдысады өзгертмелер милли пул бирлигимизиң сатыналаҗылык укыбыны беркемегини үпҗүн этмек билен, халкымызың дурмуш хал ягдайыны пугталандырмага, юрдымызың ыкдысады кувватының артмагына мүмкинчилик берйәр. 2015-нҗи йылың 2-нҗи октябрында гечирилен Түркменистаның Министрлер Кабинетиниң гиңишлейин меҗлисинде, милли ыкдысадыетимизиң гүйчли депгинлер билен өсйәндиги, җеми ичерки өнүмиң өндүрилишиниң 8,3% артандыгы, юрдымызың ыкдысадыетине гөнүкдирилен мая гоюмларының мөчбериниң гечен йыла гараныңда 8,2% ёкарланандыгы, шейле өсүшлериң юрдымызың әхли пудакларында хем газаныландыгы айратын белленилип гечилди. Хәзирки вагтда дүнйәде довам эдйән ыкдысады чөкгүнлиге гарамаздан юрдымызың ыкдысадыетиниң ынамлы өсүшлер билен довам этмеги, юрдымыза дашары юрт мая гоюмларың мөчберлериң ызыгидер артмагы, манадың хүмметсизленмек дереҗесине гөзегчилик эдилйән чәклерде сакланылмагы, хусусыетчилигиң өндүрйән өнүмлериң мөчберлериниң артдырылмагы, тәзе өнүмчиликлериң ве халкара стандартларына лайык гелйән дөвребап технологияларың орнашдырылмагы милли ыкдысадыетимизиң бинядының беркдигиниң аламатыдыр. Шейле өсүшлериң довам эдйән юрдында милли пул бирлигиниң хүммети гачып билерми дийен сорага ислендик ыкдысадыетчиниң ёк дийип җогап берҗекдиги икиучсыздыр. Энвер Тайлыев, ыкдысады ылымларының кандидаты http://ertir.com