Tebigata gyşyñ demi ýaýrady, Ýodalarda buzlar döndi düşege. Mähribanym, ýene senden jañ geldi: "Balam, sowuk. Ýyljak geýin, üşeme!" Ýok, eje jan, tenim sowuk duýanok, Egnimde palto bar, elimde ellik, Aýagymda ýüñ jorabym, ädigim. Häzir-ä üst-başym gülala-güllük! Ýöne, eje, kalbym üşeýär juda, Gagşaýar, gatadyp barýar ýüregmi. Hut häzir men muny diýmän bilemok, Öt günämi agyrdaýsam ýüregñi! Göni gursagymy nyşan edinýär Töwerekde otly sözleñ tikeni. Indi magat göz ýetirdim: Ogluña Käbäm, diñe sen düşünjek ekeniñ. Gargalar başyma hekem boldy-da, Gonup bilmän, gökde durnam jyklaýar. Ýaşlykmy, ýatlykmy, garaz, bir zad-a Kalbymy dyngysyz dyrnaçaklaýar. Men ýene kän zady öwrendim bärde, Duşman däl tumşugña kakan her kişi, Dost bolmaýar her ýüzüñe gülenden, Eje, ogluñ iñ aýylganç etmişi: Maña ynananlañ köýdi tamasy, Ynandym ynama deger-degmeze. (Aslynda, hemmämiz şeýle, Pyçagy duýýas direlende kekirdegmize.) Tebigata gyşyñ demi ýaýrady, Ýodalarda buzlar döndi düşege. Arkaýyn bol, alada-da etme sen, Eje, ogluñ ýyly geýnen - üşemez!