Dünýäniň iň ýaş milliarderi Häzirki zaman ösen tehnologiýalar dünýäsinde internet ulgamynyň nä derejede möhüm orny eýeleýändigini nygtamagyň kän bir hajaty ýok bolsa gerek. Soňky döwürde durmuşyň aýrylmaz bölegine öwrülen internet ulgamy dürli ugurdaky işewürleriň hem ýüze çykmagyna ýardam edýär. Şolaryň biri hem 1984-nji ýylyň 14-nji maýynda doglan Mark Zukerbergdir. 26 ýaşly Mark her ýylyň jemleri boýunça Forbes žurnalynyň taýýarlaýan “Dünýäniň milliarderleri” atly sanawynda 785-nji orny eýeläp, diňe öz gazanan serişdeleriniň hasabyna “Dünýäniň iň ýaş milliarderi” diýen ada mynasyp boldy. Žurnalyň redaktorynyň orunbasary Matiw Miller “Garward uniwersitetiniň uçurymy Mark Zukerberg häzirki wagtda Ýer ýüzünde diňe öz gazanan serişdeleri bilen taryhda iň ýaş milliarder adyny aldy” diýip belleýär. Eýsem, geljekde kompýuter dünýäsinde Bil Geýts bilen bäsleşjek Mark Zukerberg beýle üstünlige nädip ýetdikä?! Zukerberg ABŞ-nyň Nýu-Ýork şäheriniň Dobbs Ferry diýen ýerinde önüp ösýär. Onuň kakasy Edward diş lukmany, ejesi Karen bolsa terapewt bolup işleýär. Mark kompýuter programmalaryny düzmäge entek orta mekdepdekä başlaýar. Ol “Flip Ekzeter” Akademiýasynda okaýarka kakasynyň iş ýeri üçin niýetläp, “Synapse” atly ýörite programma taýýarlaýar. Mikrosoft we AOL kompaniýalary bu programmany satyn almak we Marky öz kompaniýalaryna işe çagyrmak isleýärler. Emma Mark mundan ýüz öwrüp, Garward uniwersitetine okuwa girýär. 2004-nji ýylyň 4-nji fewralynda Garward uniwersitetiniň umumy ýaşaýyş jaýynda Mark Zukerberg we onuň ýakyn dostlary tarapyndan häzirki wagtda dünýä boýunça 250 milliondan gowrak ulanyjysy bolan “Facebook” (feýsbuk) aragatnaşyk saýty işlenilip düzülýär. Ilki başda bu internet saýty diňe Uniwersitetiň öz çäginde işläp başlaýar. Emma soňabaka bu aragatnaşyk saýty Stanford, Darmut, Kolumbiýa, Kornel, Ýale ýaly uniwersitetlere we beýleki birnäçe mekdeplere ýaýradylýar. 2006-njy ýylyň aýaklaryna feýsbuk saýty ähli ulanyjylara gapysyny giňden açýar. Bu saýt adamlaryň bir-birleri bilen ýakyn aragatnaşyk saklamaklaryna ýardam edýär. Mark Zukerberg feýsbuk saýtynyň dolandyryjysy bolup işleýär. Ol öz edarasynda feýsbuk saýtynyň hyzmatlarynyň dizaýnyny ýerine ýetirýär, şeýle hem kompaniýanyň tehnologiýa infrastrukturasyna gözegçilik edýär. 2007-nji ýylda Mikrosoft kompaniýasy bu saýtyň ýyllyk girdejisiniň 1,6%-ini öz hasabyna geçirmek şerti bilen feýsbugy 240 million dollara satyn alýar. Şondan soňra Mark Zukerberg “Palo Alto” işewürler merkezinde Feýsbuk.com-yň baş direktory hökmünde doly işe başlaýar.