Meni ýitirersiň... Buçagaz ýitgi Äleme ne ýeňil, ne agyr düşer. Ýene öňküsi dek gülüp dogar Gün, Ýene öňküsi dek Aý dymyp ýaşar. Meni ýitirersiň... Ýitenim üçin Ne garalar, ne-de saralar jahan. Ýene öňküsi dek şuwlar gara gyş, Ýene öňküsi dek gül açar bahar. Meni ýitirersiň... Ol ýitgi üçin Üýtgemez älemiň ýekeje gylam. Diňe bir sekuntlyk gygyrar toprak, Aýylganç gygyrar: “Ýandy bu oglan!” Gygyrar: “köýdürdiň melguna uýup, Söýginiň äpedin, dostlaryň beýgin. Akylyň-a örän uludy welin, Akylyň dek uly ýalňyşdyň, keýgim!”