(Aýdyşyk)

Magrupy:
Bizden salam olsun molla Gaýyba,
Dünýäniň binasy haçan tutuldy?
«Küntu-kenzen mahfiýenden» habar ber,
Kelemeýi-şahadat nirde bitildi?

Gaýyby:
Gaýry salam bolsun molla Magrupa,
Hak «kün» diýdi, şol gün bina edildi;
Tuby agajynyň ýapraklarynda,
Kelemeýi-şahadat şonda bitildi...

Magrupy:
Hak owwal namany kime okutdy,
Ol kim idi, okyp, ozün unutdy,
Adamdan ilgeri niçe kowum ötdi,
Dergahda haýsynyň sözi tutuldy?

Gaýyby:
Hak owwal namany Adama okutdy,
Okyban Ezraýyl özün unutdy,
Adamdan ilgeri Benijan ötdi,
Dergahda resulyň sözi tutuldy.

Magrupy:
Haýsy günde bina etdi ol guşy,
Niçedir ganaty, guýrugy, başy.
Höregi nämedir, niçedir ýaşy,
Niçe müň ýyldan soň başy ýetildi?

Gaýyby:
Penşenbe gün bina etdi ol guşy,
Dört bolar ganaty, guýrugy, başy,
Höregi darydyr, elli müň ýaşy,
Elli müň ýyldan soň başy ýetildi.

Magrupy:
Suwdaky balygyň puşty näçenli,
Üstündäki gäwniň göşti ňäçenli,
Ol arşy-agzamnyň hyşty näçenli,
Niçe melek hasabynda bitildi?

Gaýyby:
Suwdaky balygyň uludyr puşty,
Ýedi müň ýedi ýüz
batman gäwniň göşti,
Gudrat bile salyndy agzamnyň hyşty,
Dört melaýyk hasabynda bitildi.

Magrupy:
Bilermi sen haly nedir, baş nedir,
Jeset nedir, menzil nedir, guş nedir,
Ol ne bazar, gymmatbaha daş nedir,
Kimiň daşy kem bahaga satyldy?

Gaýyby:
Eger bilsem haly budur, boş budur,
Jeset menzil, janyň gerek guş idir,
Ol imanyň gymmatbaha daş idir,
Şeýtan daşy kembahaga satyldy.

Magrupy:
Magrupy diýr, ne kysmatda ýazyldy,
Ol ne zynjyr, bir-birine düzüldi,
Niçe ýylda wagty ýetip üzüldi,
Aý bile Gün haýsy wagtda tutuldy?

Gaýyby:
Gaýyby aýdar, gurbat bilen ýazyldy,
Gije-gündiz bir-birine düzüldi,
Sansyz ýylda wagty ýetip üzüldi,
Aý bile Gün harasatda tutuldy.

Gurbanaly Magrupy bilen Mahmyt Gaýybynyň aýdyşyk şygry.