Bolsun şeýle ertekimiz
Bolsun şeýle ertekimiz,
Birazajyk gussa bolsun.
Ýöne arzuw ummanyndan
Altyn balyk tutsa bolsun.

Akpamygyň kökejigi
Tigirlensin bagta sary.
Ertir süýji düýşlermiziň
Ýorulsynlar nagta bary!

Bet pygyllar öz-özüne
Duzak gurup galybersin.
Ýollar alsyn köwşümizi,
Ykbal uçýan haly bersin.

Ýartygulak halas etsin,
Betnebisden, açgözlerden.
Guraly täsin ymarat,
Mähre ýugrulan sözlerden.

Tilkiň buzdan öýi ýaly,
Yşkymyz hiç eremesin.
Meni özge han gyzlarnyň
Hiç birine deňeme sen!

Ýok bolmasyn ýeke zadam,
Gül bolsun hem tiken bolsun,
Bolsun şeýle ertekimiz,
Diňe «Bir bar eken...» bolsun!

Gülsirin Hanowa