"Asmandaky we zemindäki barça zatlar ondan dileg edýändirler, Ol her
günde öz ornundadyr (ýerindedir)", elmydama Ony ýatlaýandyr (soraýandyr), Ol
elmydama şol beýikligindedir"
Deňizler möwjese, tolkunlar gomasa, ýeller öwüsse, gämidäkiler "Eý Allah"
diýip seslenerler.
Sähralykdan barýan ugruny ýitirse, (ýolundan sowulsa, çölde azaşsa), ulaglar
ýolda agsa, kerwen ýoluny ýitirse, "Eý Allah" diýip seslenerler.
Bir bela duçar bolunsa, bela daňysy çözülip, heläkçilik başa inse, derdi-
mähnet artyp ugrasa, başy dertliler "Eý Allah" diýip seslenerler.
Mätäçleriň barara jaýy bolman, talap gapylary baglansa, saýyllaryň naýynjar
ýüzüne galyň perdeler çekilse, olar "Eý Allah" diýip seslenerler.
Çäredir alaçlar netije bermese (tükense, gutarsa), ýöreljek ýollar daralsa,
umytlar tükense, ýüpler üzülse, arzuwlar gugaryp galsa, adamlar "Eý Allah" diýip
seslenerler.
Bu giň dünýä gursagyňy gysyp gowursa (Ýeriň bu ýaýbaňlygy, dünýäniň bu
giňligi saňa dar görünse), egniňden basýan ýükler göterip biljegiňden agyr
görünse, ýagyrnyny ýegşerdip, köňlüňe agram salsa, ýüregiň daralsa, sen pyşyrdap
"Eý Allah" diýip seslenersiň.
Ýakymly sözler, halys ýürekden edilen ýagşy dileg-dogalar, gözel we
sogaply amallar, çuň we çyn pyşyrdylar, günäsiz gözýaşlar, ýiti agyrylardan çykan
iňlemeler, elbetde onuň dergahynda has gowy eşdilýändir.
Säherde aýalar Oňa tarap (uzalar), mätäçlikde eller Oňa tarap uzalar,
başagaýlykda gözler Oňa tarap sereder, hadysalarda dilegler Oňa tarap gönüger.
Diller Onuň ady bilen gurbatlanar, Onuň ady bilen kömek-ýardam sorar,
Onuň adyny gaýtalar we elmydama Ony çagyrar. Ýürekler Ony ýatlamak bilen
köşeşer we ruhlar Ony ýatlamak bilen ynjalar. Ony ýatlamak bilen duýgular
köşeşer we beýniler sowar. Akyllar ýerine geler we aňlar karar tapar, ynjalar.
"Allah bendesine örän mähribandyr, Latyfdyr".
Allah: iň gowy at, iň owadan harplar, örän hak aýdylan söz we iň gymmatly
keleme. "Heý-de Onuň atdaşy bardyr öýdýärmiň?!"
Allah: baýlyk we bakylyk, güýç-kuwwatlylyk we üstünlik, beýiklik, bar zady
başarmaklyk we her bir zatda hikmetlilikdir, "bu gün patyşalyk kime degişlidir
diýilse, aýdyň Bar zady boýun ediji Biribar Allanyňkydyr".
Allah: lutfy-kerem we enaýat sahybydyr, ýardam goly we hemaýatdyr, mähir-
muhabbet we haýyr-yhsandyr "Size berlen her bir nygmat Alla tarapyndyr".
Eý Allahym ýanar oduň ýerini tesellä (gülzarlyga) öwür, gaýgynyň öwezini
şatlyk bilen doldur, howp-hatarda asudalyk we amanlyk ber. Eý Allahym ýüregiň
gyzgyn howruny paýhas gary bilen sowat. Ruhlaryň gyzgyn közüni iman suwy
bilen söndür.
Eý Perwerdigärim, aladalardan ýaňa ukusyz gözlere Öz dergahyňdan
asudalyk, ynjalyk we rahat uky ber, çaýkanyp duran nebislere (köňüllere) ynjalyk-
karar ber, olary golaý gelen ýeňiş-üstünlik bilen ruhlandyr. Eý Perwerdigärim,
çaşgyn, aljyraňňy gözleri Öz nuruňa gönükdir, azaşan, ýoldan sowlan ýollary
dogry ýoluňa sap, ýoluňdan sowa düşenleri hidaýatyňa sal, gönükdir.
Eý Allahym, ýagty nurly sadyk daňlar bilen göwünleriň waswasyny aýyr, hak
esgerleri (ýelkeni) bilen batyl wyjdanlary sow, sap-sap duran (perişdeleriň)
esgerleriň bilen şeýtan hilelerini yzyna serpikdir.
Eý Allahym, biziň gaýgylarymyzy gidir, ünjülerimizi aýyr, köňüllerimiziň
birahatlygyny kowup çykar.
Eý Allahym, Senden özgelerden gorkmaly etmäweri, Senden başgalara
daýanmaly etmäweri, Senden başgalara bil baglamaly etmäweri, Senden
başgalardan dilemeli etmäweri, Senden başgalardan ýardam soramaly etmäweri,
Sen biziň Eýämiz, iň gözel Möwlamyz we iň gowy Ýardamçymyzsyň.