Her bir maşgalada özboluşly mesele ýüze çykyp bilýär. Maşgala gatnaşyklarynda emele gelýän düşünişmezlikler we ýetmezçilikler öýdäki çagalara zyýan ýetirilmezden çözülmelidir. Çaga ene-atanyň arasyndaky dawa-jenjeliň sebäbini bilmeýänligi üçin, çagalyk dünýäsinde bu gykylygy özüçe çişirýär. Mysal üçin, ejesi balagyny ölleýän çagasyna gygyrýar, her gezek şol ýagdaý gaýtalananda ýene gygyrýar. Kakasy hem ejesine: «Sesiň näme? Bes et! Çagadyr-da, gygyrma!» diýip, gykylyk bilen çaganyň arkasyny alýar. Çaga bu gykylykdan hem ikuçsuz täsirlenýär. Şeýle halatda çaga: «Ýene-de men sebäpli gygyryşýarlar» diýip pikir edip bilýär.

Okyjyda «Maşgalada bolup bilýän şunuň ýaly ýagdaýlary çaga hiç hili görmeli dälmi?» diýen sorag ýüze çykyp biler. Görmeg-ä beýlede dursun, aslynda çaga ýaşyna görä öýüň içinde emele gelýän meseleleriň çözüliş prosesine gatnaşmaly. Öz maşgalasynda näme etseň bolýandygyny, näme etseň bolmaýandygyny ol ene-atasyndan görüp öwrenmeli. Onuň ýanynda maşgala bilen bagly orta atylan her bir mesele ertire goýulman çözülmeli. Öňi bilen, maşgaladaky näsazlyklary çaganyň ýanynda goh-galmagal bilen çözmekden gaça durmaly. Galyberse-de, käbir düşünişmezlikleri her ýadyňa düşende orta atyp durmaly däl-de, bolmanda çaganyň ýok ýerinde ara alyp maslahatlaşmaly. Eger-de öýdäki meseleler sebäpli gykylyklar zol gaýtalanyp durýan bolsa, çaga ol öýde mähirden ganyp bilmez, tersine «indi haçan gykylyk bolarka» diýen gorky bilen ýaşar.

Pedagogiki çeşmeler esasynda taýýarlan Kätip Myradow