Onda dünýä düňderiler ahyryn!

Günlerde bir gün Ependiden:

– Näme üçin adamlaryň köpüsi ber-başagaý bolşup, çar taraplara gidip barýarlar? – diýip sorapdyrlar.

Onda Ependi:

– Eger hemme kişi bir tarapa gitse, ýeriň şol tarapy agralyp, dünýäniň düňderiläýmegi ahmal ahyryn! – diýip düşündiripdir.



***

Reňkinä gysganmadyr

Ependiniň bir gara towugy bar eken. Bir gün ony bazara satmaga getiripdir. Onuň ýanyna bir hyrydar gelip:

– Şu towuk ak bolan bolsady, onda men satyn alardym – diýipdir.

Onda Ependi:

– Sen ertir bu ýere gel. Saňa bir ak towuk getireýin – diýipdir. Ol adam hem «bolýar» diýip, ylalaşyp öz ugruna gidipdir.

Ependi towugy öýe getiripdir. Soňra eline bir tokga sabyn alyp, suw ýyladyp, ol towugy ýuwmaga başlapdyr. Emma näçe ýuwsa-da, ol sähelçe-de agarmandyr. Ahyry Ependiniň jany ýanyp:

– Görýän welin, bu towugy reňklän adam bolsada reňkinä gysganmadyr. Ol hakyny tüýs halallap işleýän adam eken – diýipdir.