Türkmenistan Garaşsyz Döwletleriň Arkalaşygyna (GDA) agza ýurtlaryň Demir ýol ulaglary boýunça geňeşiniň wideomaslahat görnüşinde geçirilen 85-nji mejlisine gatnaşdy. Mejlise Geňeşiň agzalary — Azerbaýjan Respublikasynyň, Ermenistan Respublikasynyň, Belarus Respublikasynyň, Gazagystan Respublikasynyň, Gyrgyz Respublikasynyň, Russiýa Federasiýasynyň, Täjigistan Respublikasynyň, Türkmenistanyň we Özbegistan Respublikasynyň demir ýol edaralarynyň ýolbaşçylary, şeýle hem Geňeşiň assosirlenen agzalary — Gruziýanyň, Eýran Yslam Respublikasynyň we Latwiýa Respublikasynyň demir ýol edaralarynyň wekilleri gatnaşdylar. Çärä Owganystanyň we Estoniýa Respublikasynyň demir ýol edaralarynyň, Arkalaşyga gatnaşyjy döwletleriň Demir ýol ulaglary boýunça geňeşiniň müdirliginiň, GDA-nyň Ýerine ýetiriji komitetiniň hem-de Demir ýol işgärleriniň kärdeşler arkalaşyklarynyň Halkara konfederasiýasynyň wekilleri hem gatnaşdylar. Bu barada GDA-nyň Ýerine ýetiriji komitetiniň resmi saýtynda habar berilýär. Mejlisiň dowamynda aşakdaky meseleler ara alnyp maslahatlaşyldy: Geňeşiň 84-nji mejlisinde kabul edilen çözgütleriň ýerine ýetirilişi we 2026-njy ýylyň dokuz aýynda demir ýol ulgamynyň ulanylyş işleriniň netijeleri; 2026-njy ýylyň dokuz aýynda halkara ýolagçy gatnawlaryny ösdürmek boýunça geçirilen işler we «Express International» halkara ýolagçy gatnawlaryny integrasiýalaşdyrmak ulgamynyň wezipeleriniň durmuşa geçirilişiniň barşy; 2026/2027-nji ýyllar üçin halkara gatnawlarda ýük otlularynyň düzüm meýilnamasyny hem-de konteýnerli wagonlaryň düzüm meýilnamasyny işläp taýýarlamak; 2026-njy ýylyň sekiz aýynda demir ýol edaralarynyň arasyndaky özara hasaplaşyklaryň ýagdaýy; 2027-nji nyrh (fraht) ýyly üçin halkara gatnawlarda ýük daşamak boýunça demir ýollaryň nyrh syýasaty. Demir ýol ulaglary boýunça geňeşiň nobatdaky mejlisini geljek ýylyň ikinji çärýeginde Russiýada geçirmek meýilleşdirilýär.